Santacruzan sa Shanghai, inabangan at pinagkaguluhan

2017-06-19 16:25:19 CRI CRI

Sa Pilipinas, kapag may pista lalo na sa buwan ng Mayo, hindi puwedeng mawala ang Santacruzan, isang festival ng mga deboto ng Birheng Maria.

Nitong nagdaang Linggo, Hunyo 18, 2017, isa sa mga tampok na aktibidad sa pagdiriwang ng Ika-119 na Araw ng Kalayaan sa Shanghai, ginanap ang kiddie Santacruzan.

Napili bilang Reyna Elena si Meg Addison Q. Santos, at si Carl Benedict dela Pena naman ang kanyang naging consorte at gumanap bilang Constantine. Kapwa 7 taong gulang ang mga bata at sila'y mag-aaral ng International Philippine School Shanghai (IPSS).

Bukod sa Santacruzan, hinarana din ni Carl, kasama ang iba pang mga mag-aaral ng IPSS ang mga panauhin ng mga awiting Molihua at Bayan Ko. Ang Molihua na nangangahulugang Jasmine ay isang kilalang kilalang awiting Tsino at inawit ito ng mga estudyante ng IPSS sa wikang Tsino.

Sa panayam ng China Radio International Filipino Service, ikinuwento ni Gemelyn Santos, ina ni Meg na huling pangalan na ipinasok ang kanyang anak sa pagpili, at sinuwerte pang mabunot para gumanap bilang Reyna Elena.

Sinabi ni Meg, "Masarap ang pakiramdam na maging reyna na may partner para sa Araw ng Kalayaan. Gusto ko ang pink na gown. Sabi ng mga kaibigan ko maganda ako. "

Ito ang kauna-unahang Santacruzan na nakita ni Meg dahil lumaki siya sa Shanghai.

First time ding sumali ng pamilya dela Pena sa Santacruzan sa Shanghai. Excited ang buong pamilya nang mapili bilang Constantine si Carl. Ani Carl, "I fell happy and great!"

Ibinahagi ni Gerame dela Pena, na habang pinapanood ang anak na kumakanta sa stage halong kaba at pagmamalaki ang kanyang naramdaman.

Sa kabuuan sang-ayon ang mga magulang na isang magandang karanasan para sa kanilang mga anak na sumali sa ganitong aktibidad upang sa murang edad ay pahalagahan nila ang mayaman at makulay na kulturang Pilipino kahit malayo sa tinubuang-lupa.

Taon-taon magkakatulong na inoorganisa ng Filipino Community sa Shanghai (FilComSha) ang mga aktibidad para ipagdiwang ang Araw ng Kalayaan. Katuwang nito ang konsulado, mga kumpanyang Pilipino sa Shanghai, iba't ibang samahan tulad ng mga propesyonal at musikero, maging ilang mga NGOs.

Ngayong taon, may samu't saring gimik kabilang ang Santacruzan, booth na mga paninda, tugtugan ng mga bandang Pinoy at ang pinakaaabangang raffle ng malalaking papremyo.


Ulat: Mac Ramos

Larawan: Vera at Ernest

Editor: Jade

Web editor: Frank

Kalendaryo

Balita:
Tsina ASEAN Daigdig Litrato
Ugnayang Pinoy:
Beijing Shanghai Guangzhou Tianjin Shenyang Shijiazhuang Tips Community Billboard
Tsina sa Aming Mata:
Sine Tsino Pop China Gabi ng Musika Cooking Show Tsina mula sa Likod ng Aking Kamera MaArte Ako
Usap-usapan Ngayon sa Tsina Pag-usapan Natin
Pag-aaral ng Wikang Tsino:
Pag-aaral ng Wikang Tsino