Malapit na! 2,000 Pilipinong guro ng Ingles, maaari nang magtrabaho sa mga pamantasan ng Tsina

2019-03-07 14:17:41 CRI

Beijing – Sa eksklusibong panayam ng Serbisyo Filipino, China Media Group (CMG) kay Jose Santiago Sta. Romana, Embahador ng Pilipnas sa Tsina, sinabi niyang sa malapit na hinaharap, 2,000 Pilipinong guro ng Ingles ang maaari nang magtrabaho sa mga pamantasan ng Tsina.

Anang embahador, napirmahan na ng Pilipinas at Tsina noong Nobyembre 2018 ang kasunduang may bisa sa loob ng 2 taon at maaaring i-renew.

Kabilang aniya sa mga kinakailangang pamantayan upang makapag-aplay sa posisyong ito ay: nagtapos sa kolehiyo, may medyor sa wikang Ingles, pumasa sa board exam, at may karanasan sa pagtuturo ng wikang Ingles.

Bingyang-diin ni Sta. Romana, na hindi na maaaring mag-aplay iyong mga nagtatrabaho sa mga state university ng Pilipinas, dahil ayaw din naman ng bansa na maubos ang mga guro nito dahil sa pangingibang-bayan.

Pero, aniya, iyong mga nasa pribadong unibersidad at iba pang pribadon institusyon ay welkam na mag-aplay sa posisyong ito.

Sa pamamagitan nito, magkakaroon aniya ng mas magandang oportunidad sa empleyo ang mga Pilipinong guro ng Ingles.

Sa paraan ng pag-aplay, sinabi ng embahador na inihahanda na ng Department of Labor and Employment (DOLE) o Philippine Overseas Employment Administration (POEA) at Foreign Expert's Bureau ng Tsina ang website upang makapag-aplay at makapag-interbyu, online, ang mga kuwalipikadong aplikante.

"Ang sinusubukan natin dito ay iwasan ang mga tinatawag na middleman," ayon pa kay Sta. Romana.

Nakita aniya ng mga Tsino na mahusay magsalita at walang masyadong rehiyonal na punto ang Ingles ng mga Pilipino, kaya naman malaking potensyal na merkado ang Pilipinas pagdating sa pagtuturo ng wikang Ingles sa Tsina.

Ang mga matagumpay na aplikante ay mapupunta sa mga pamantasan ng Tsina at magtuturo sa lebel ng kolehiyo.

Ani Sta. Romana, ito ay unang hakbang pa lamang, at depende sa magiging resulta, maaari pang magpadala ng mga karagdagang Pilipinong guro ng Ingles sa Tsina, sa hinaharap.

Ulat: Rhio
Photographer: Lito
Web Editor: Lito

Balita:
Tsina ASEAN Daigdig Litrato
Ugnayang Pinoy:
Beijing Shanghai Guangzhou Tianjin Shenyang Shijiazhuang Tips Community Billboard
Tsina sa Aming Mata:
Sine Tsino Pop China Gabi ng Musika Cooking Show Tsina mula sa Likod ng Aking Kamera MaArte Ako
Usap-usapan Ngayon sa Tsina Pag-usapan Natin
Pag-aaral ng Wikang Tsino:
Pag-aaral ng Wikang Tsino