Tsina, namumuno sa globalisasyon at malayang kalakalan—Speaker GMA

2019-03-28 11:15:47 CRI

Kasalukuyang ginaganap sa Boao, Lalawigang Hainan ng Tsina, ang taunang pulong ng Boao Forum for Asia (BFA) sa taong 2019. Kinatawan ng Pilipinas sa 2019 BFA si Dr. Gloria Macapagal-Arroyo, Ispiker ng Mababang Kapulungan ng Pilipinas. Sa one-on-one interview ng Serbisyo Filipino ng China Media Group, ibinahagi niya ang pananaw tungkol sa BFA, Belt and Road Initiative (BRI), globalisasyon, malayang kalakalan at iba pang paksa.

Ang tema ng kasalukuyang BFA ay "Shared Future, Concerted Action, Common Development." Saad ni Dr. Arroyo, nang simulan ng Tsina ang pagsasagawa ng reporma 40 taon na ang nakakaraan, nag-alala ang Pilipinas na baka maging kakompetisyon sa pamilihang pandaigdig ang Tsina, bilang isang bagong "economic dragon". Batay sa 40 taong pag-unlad, nalaman nilang may sariling estilo ang Tsina, at nagsilbi itong development partner, sa halip na kakompetisyon. Ito ang may pinagbabahaginang kinabukasan na pinag-uusapan natin, dagdag niya.

Sa tingin ni Arroyo, ang Tsina ay hindi lamang isang pamilihan para sa Pilipinas, kundi tagapag-ambag at tagapagkaloob din ng kapital at teknolohiya.

Nitong nakalipas na ilang taon, grabeng naapektuhan ang multilateral na sistemang pangkalakalan. Ang unilateralismo at proteksyonismo ay nagbunsod ng kawalan ng katiyakan sa kabuhayang pandaigdig. Kaugnay nito, sinabi ni Arroyo na noon, ang Amerika ay kampeon sa globalisasyon at malayang kalakalan, pero pagkaraang isagawa ang "Trump style policy," humahalili sa Amerika ang Tsina para mamuno sa globalisasyon at malayang kalakalan. Pag-asa niyang ipagpapatuloy at kokompletuhin ang global trading system.

Ang Belt and Road Initiative ay isa pang mainitang paksa sa kasalukuyang BFA. Sa palagay ni Ispiker Arroyo, ang BRI ay mahalagang lakas-panulak para sa kooperasyong pangkabuhayan sa pagitan ng Tsina at mga bansa ng Association of Southeast Asian Nations (ASEAN). Saad niya, mahalagang mahalaga ang trade agreements para sa liberalisasyon ng kalakalan at pamumuhunan, at ito ay parang software ng liberalisasyon at kaunlarang pandaigdig. Kailangang kailangan din aniya natin ang hardware na ipinagkaloob ng Belt and Road, ibig sabihin, ang suporta sa imprastruktura. Ito ang papel ng BRI na nagkakaloob ng hardware para sa reporma at pagbubukas ng software, dagdag niya.

Tinaya rin ni Arroyo na ang isa sa mga larangan ng pagpapaunlad ng kalakalan ng Tsina at Pilipinas sa hinaharap ay nakasalalay sa serbisyo, dahil malakas ang Pilipinas sa aspektong ito.

"Dahil umuunlad nang umuunlad ang Tsina, sana bahagi kayo sa kaunlarang iyon," yan ang mensahe ni Arroyo para sa mga kababayang Pilipino na nandito sa Tsina.

Ulat: Vera
Litrato: Li Jin
Web Editor: Li Feng

Balita:
Tsina ASEAN Daigdig Litrato
Ugnayang Pinoy:
Beijing Shanghai Guangzhou Tianjin Shenyang Shijiazhuang Tips Community Billboard
Tsina sa Aming Mata:
Sine Tsino Pop China Gabi ng Musika Cooking Show Tsina mula sa Likod ng Aking Kamera MaArte Ako
Usap-usapan Ngayon sa Tsina Pag-usapan Natin
Pag-aaral ng Wikang Tsino:
Pag-aaral ng Wikang Tsino