Pilipinas, nakinabang ng malaki sa pagiging punong-abala sa ASEAN

2017-11-21 14:28:14

SINABI ni Presidential Spokesperson Harry Roque na nakinabang ang Pilipinas sa pagiging punong-abala sa ika-31 ASEAN Summit at Related Meetings na natapos noong nakalipas na linggo.

Sa isang press briefing sa Malacanang, sinabi ni Secretary Roque na nagkaloob ang Estados Unidos ng US$ 14.3 milyon para sa pag-aayos ng Marawi City at US$ 2 milyon para sa programa laban sa droga.

Nagkaroon din ng 14 na kasunduang nalagdaan sa pag-itan ng Pilipinas at Tsina sa larangan ng ekonomiya, pagawaing-bayan, transportasyon, kapaligiran, intellectual property, national security at pananalapi.

Sa pagdalaw ni Prime Minister Shinzo Abe ng Japan, magpapa-utang ang bansang Hapon ng P 46 bilyon para sa unang bahagi ng Metro Manila subway. Magkakaroon din ng P 4 bilyon para sa pagkakaroon ng bagong lansangan sa Philippine-Japan Friendship Highway sa Plaridel, Bulacan.

Magkakaloob din ang Japan ng isang bilyong pisong halaga ng kagamitan at pangangailangan sa pagsugpo ng terorismo tulad ng mga coast-watch radar at pagsasaayos ng Marawi City.

Mula sa Russia, mayroong walong bilateral agreements sa larangan ng kriminalidad, extradition, energy, communication, edukasyon, intellectual property, audits at accounts.

Nagkaroon din ng kasunduan sa Canada na nagkakahalaga ng $ 17.8 milyon para sa sexual health at empowerment projects para sa kababaihan sa bansa.

May tatlong kasunduan din sa New Zealand sa larangan ng edukasyon, turismo at geothermal energy.

Ayon kay Atty. Roque, naisulong din ng Pilipinas ang Generalized System of Preference sa Estados Unidos at susuriin ang mga magaganap na pag-uusap sa larangan ng Philippines-US Free Trade Agreement.

Higit na makapapasok na rin ang mga saging mula sa Pilipinas sa Australia, Japan at South Korea.

Napag-usapan din ang paggawa ng mas murang gamot sa India at ang posibilidad na makapagtayo ng mga pagawaan ng gamot sa Pilipinas at pagtutulungan upang masugpo ang pamimirata sa Sulu sa pagitan ng Pilipinas at Australia.

Sinabi rin ni Secretary Roque na sa pag-uusap nina Pangulong Dutgerte at Premier Li ng Tsina, inialok ni G. Duterte sa Tsina na maghanda upang patakbuhin ang ikatlong telecom carrier sa bansa.

Kasunod ito ng paglagda ng Pilipinas sa isang kaalyado ng Facebook hinggil sa isang proyektong pinangalanang “Luzon Bypass” ng Pacific Light Cable Network na maglalaan ng badwidth na dalawang terabits sa bawat segundo. Katapatan ito ng kapasidad ng Smart at Globe.

Kalendaryo

Balita:
Tsina ASEAN Daigdig Litrato
Ugnayang Pinoy:
Beijing Shanghai Guangzhou Tianjin Shenyang Shijiazhuang Tips Community Billboard
Tsina sa Aming Mata:
Sine Tsino Pop China Gabi ng Musika Cooking Show Tsina mula sa Likod ng Aking Kamera MaArte Ako
Usap-usapan Ngayon sa Tsina Pag-usapan Natin
Pag-aaral ng Wikang Tsino:
Pag-aaral ng Wikang Tsino