Sarado pa ang NAIA Runway 06/24

2018-08-17 18:21:00

NANANATILING sarado pa ang Runway 06/24 at baka sakaling mabuksan ganap na ikapito ng gabi ngayon.

Ayon sa Civil Aeronautics Authority of the Philippines, isang Xiamen Airlines flight MF8667 Boeing 737 ang lumapag sa NAIA bago sumapit ang hatinggabi kagabi at nakarating sa madamong pook ng runway.

Tumugon ang mga pamatay-sunog at safety personnel at nailikas ang may 157 pasahero at walong tripulante. Dinala sila sa Terminal 1. Nagtungo kaagad sina MIAA General Manager Ed Monreal, CAAP Director Capt. Jim Sydiongco at Accident Investigation Inquiry Board chief Mr. Rainer Baculinao.

Nailikas ang mga pasahero sa pamamagitan ng emergency chutes. Binigyan sila ng mga kumot at pagkain ng Xiamen Airways at dinala sa malapit na hotel upang may matuluyan.

Unang nagtangka ang pilotong 'di pinangalanan subalit hindi itinuloy sa lakas ng ulan. Sa ikalawang pagkakataon, dumulas ang eroplano sanhi ng malakas na buos ng ulan.

Naglabas kaagad ang CAAP ng Notice to Airmen na nagsasabing saradong pangsamantala ang paliparan hanggang ika-12 ng tanghali.

Sa pangyayaring ito, may 49 na biyahe ng eroplano sa loob at labas ng bansa ang nakansela at may 10 diverted flights. May dalawang biyahe ng Cathay Pacific ang naayos ang schedule. Walang sinumang nasugatan sa sakuna sa matagumpay na paglilikas ng mga pasahero at mga tauhan ng Xiamen Airways.

Pitong biyahe ang pinalapag sa Clark at maging sa Cebu International airports.

Hiniling ng CAAP ang unawa ng mga maglalakbay samantalang ginagawa na ang lahat upang maalis ang eroplano sa pook ng sakuna.

Samantala, sa pinakahuling balita, mananatiling sarado ang paliparan hanggang ikapito ng gabi. Sa ikatlong Notice to Airmen, problemado ang mga kawani ng paliparan sa pag-aalis ng eroplano sapagkat malambot ang tabi ng runway dahil sa malakas na ulan kagabi.

Magagamit ng mas maliliit na eroplano tulad ng A320 ang domestic runway 13/31 sa kanilang paglapag at paglipad.

Balita:
Tsina ASEAN Daigdig Litrato
Ugnayang Pinoy:
Beijing Shanghai Guangzhou Tianjin Shenyang Shijiazhuang Tips Community Billboard
Tsina sa Aming Mata:
Sine Tsino Pop China Gabi ng Musika Cooking Show Tsina mula sa Likod ng Aking Kamera MaArte Ako
Usap-usapan Ngayon sa Tsina Pag-usapan Natin
Pag-aaral ng Wikang Tsino:
Pag-aaral ng Wikang Tsino