NoKor, naglunsad ng ballistic missile; mga bansa, hinimok ang NoKor na sundin ang UNSC resolution

2017-09-16 16:18:15

Inilunsad Biyernes ng umaga, Setyembre 15, 2017, ng Hilagang Korea ang isang intermediate-range ballistic missile na bumagsak sa karagatang Pasipiko sa dakong silangan ng Hapon. Kaugnay nito, nagpahayag ang maraming bansa ng kondemnasyon o kalungkutan. Tinututulan nila ang pagsubok-lunsad ng Hilagang Korea ng missile at hinimok ito na totohanang tupdin ang kaukulang resolusyon ng United Nations (UN) Security Council upang makabalik sa landas ng paglutas sa isyu sa pulitikal at diplomatikong paraan.

Inilabas nang araw ring iyon ng pamahalaang Timog Koreano ang pahayag na mahigpit na kinokondena ang muling paglulunsad ng Hilagang Korea ng ballistic missile. Binatikos nito ang Hilagang Korea na lumabag sa kaukulang resolusyon ng UNSC at nagdulot ng panganib sa kapayapaan at katatagan ng Korean Peninsula at komunidad ng daigdig. Hinimok din ng pahayag ang Hilagang Korea na itigil ang "probokasyon," at bumalik sa landas ng diyalogo sa pinakamadaling panahon.

Ipinayayag din Biyernes ni Tagapagsalita Maria Zakharova ng Ministring Panlabas ng Rusya na ang paglulunsad ng Hilagang Korea ng ballistic missile ay lumabag sa pinakahuling resolusyon ng UNSC. Lubos aniyang ikinalulungkot ng Rusya ang bagay na ito. Ipinalalagay ng Rusya na dapat tupdin ng walang-pasubali ng may-kinalamang panig ang resolusyon ng UNSC.

Sa isa namang pahayag na inilabas nang araw ring iyon ng Kagawaran ng Estado ng Amerika, sinabi nito na ang pagpapalipad ng Hilagang Korea ng missile ay ikalawang probokatibong aksyon kamakailan na nagsasapanganib sa Hapon, kaalyadong bansa ng Amerika.

Kinondena rin ni Pangkalahatang Kalihim Antonio Guterres ng UN ang nasabing missile-launch ng Hilagang Korea. Nanawagan siya sa Hilagang Korea na itigil ang ibayo pang pagsubok-lunsad at tupdin ang resolusyon ng UNSC.

Ipinahayag ni Tagapagsalita Hua Chunying ng Ministring Panlabas ng Tsina, na tinututulan ng panig Tsino ang paglabag ng Hilagang Korea sa kaukulang resolusyon ng UNSC. Aniya, masalimuot, sensitibo, at mahigpit ang situasyon sa Korean Peninsula. Dapat magtimpi ang iba't-ibang may kinalamang panig upang hindi gumawa ng anumang bagay na posibleng magpalala sa maigting na kalagayan sa rehiyong ito, dagdag pa niya.

Salin: Li Feng

Kalendaryo

Balita:
Tsina ASEAN Daigdig Litrato
Ugnayang Pinoy:
Beijing Shanghai Guangzhou Tianjin Shenyang Shijiazhuang Tips Community Billboard
Tsina sa Aming Mata:
Sine Tsino Pop China Gabi ng Musika Cooking Show Tsina mula sa Likod ng Aking Kamera MaArte Ako
Usap-usapan Ngayon sa Tsina Pag-usapan Natin
Pag-aaral ng Wikang Tsino:
Pag-aaral ng Wikang Tsino